بدنجان

يا شرق فيك جو منور

والفكر ضلام

وفيك حراره يا خساره

وبرود اجسام

فيك تسعميت مليون زلمه

لكن اغنام

لا بالمسيح عرفوا مقامهم

ولا بالاسلام

هي الشموس بتخلي الروس

كدا هو بدنجان

بيرم التونسي

عتاب

ليه امشى حافى ،وانا منبت مراكيبكم
ليه فرشى عريان،وانا منجّد مراتبكم
ليه بيتى خربان ،وانا نجّار دواليبكم
هى كده قسمتى؟
الله يحاسبكم!

ساكنين علالى العتب،وانا اللى بانيها
فارشين مفارش قصب،ناسج حواشيها
قانيين سواقى دهب،ونا اللى ادور فيها
يارب ماهوش حسد
لكن بعاتبكم

من الصباح للمسا،والمطرقه فيدى
صابر على دى الاسا ! حتى نهار عيدى
ابن السبيل انكسى ، واسحب هرابيدى
تتعروا من مشيتى
واخجل اخاطبكم

ليه تهدمونى وناللى عزكم بانى
انا اللى فوق جسمكم قطنى وكتانى
عيلتى فى يوم دفنتى مالقيتش اكفانى
حتى الاسيّه وانا راحل وسايبكم؟

المجلس البلدي

قد أوقع القلبَ في الأشجانِ والكمدِ

هوى حبيبٍ يُسمّى المجلس البلدي

ما شرّد النومَ عن جفني سوى

طيف الخيال، خيال المجلس البلدي

***

.. حتى يقول

كأنّ أمي أبلّ الله تربتها

أوصت فقالت: أخوك المجلس البلدي



أخشى الزواج، فإنْ يومُ الزواج أتى

يبقى عروس صديقي المجلس البلدي

وربما وهب الرحمن لي ولدًا

في بطنها يدّعيه المجلس البلدي

يا بائع الفجل بالمليم واحدةً

كم للعيال؟ وكم للمجلس البلدي؟

بيرم التونسي

الصنم

هبط الجنيه من قمّته و المليونير : ضج و لطم

و لما تهبط ذمته الحزن ينساه و الألم

و لما تسقط حرمته يظن روحه محترم

عنده الجنيهات كل شيء و كل شيء غيرها عدم

* * *

أما الفقير قام و استجار و من الهلع قلبه انخلع

بايت يفكر .. ليل نهار ليرتفع سعر السلع

و اللحمه اهيه و الخضار أسعرها حتسوق الدلع

ياما الجنيه رخّص رجال و غَلىَّ أسعار الغنم

* * *

دي جيفه منتنه صار ابن آدم عبدها

فليسقط الصنم الجنيه اللي بتسجد له الأمم

بيرم التونسي

خطاب إلى الموميه

في مصر كنت الملك لك جيش ولك حاميه

ودوله غير دولتك ما تعمل الموميه

و امه غير امتك ما تزرع الباميه

ولما خشوا عليك المقبره يلاقوك

نايم مفتح .. ولكن في بلد عـميه

بيرم التونسي

الجماهير

المستحيل إنت تخدع أي طفل صغير

و تلف عقله و تعطيه القليل بكتير

لكن بأهون طريقه تخدع الجماهير

لو كنت أغبى غبي تجري وراك و تسير

* * *

خليل يصقَّف, يصقف شعب ويا خليل

من غير ما يسأل عن الأسباب والتفاصيل

* * *

و حمار يغني, وجايب من يقول له: آه

حالاً تقول الخلايق كلها ويّاه

* * *

الحق يخفى وفي وسط الزحام ينداس

وناس في فهم الحقيقه, تتكل على ناس

ويساعدك الحظ ياللي تحسن التجعير


بيرم التونسي

وصف حال مصر

سلوا قلبى وقولوا لى جوابا * لماذا حالنا اضحى هبابا
لقد زاد الفساد وساد فينا * فلم ينفع بوليس او نيابه
وشاع الجهل حتى ان بعضا * من العلماء لم يفتح كتابا
وكنا خير خلق الله صرنا * فى ذيل القايمة وف غاية الخيابا
قفلنا الباب احبطنا الشبابا * فادمن او تطرف او تغابى
ارى احلامنا طارت سرابا * ارى جناتنا اضحت خرابا
وصرنا نعبد الدولار حتى * تقول له انت ماما وانت بابا
وملياراتنا هربت سويسرا * ونشحت م الخواجات الديابه
ونهدى مصر حبا بالاغانى * فتملؤنا اغانينا اغترابا
وسيما الهلس تشبعنا عذابا * وتشبعنا جرائدنا اكتئابا
زمان يطحن الناس الغلابة * ويحيا اللص محترما مهابا
فكن لصا اذن او عش حمارا * وكل مشا اذن او كل كبابا
ودس ع الناس اوتنداس حتى * تصير لنعل جزمتهم ترابا
امير الشعر عفوا واعتذارا * لشعرك فيه اجريت انقلابا
وما نيل المطالب بالطيابه * دى مش دنيا يا شوقى بيه دى غاب


سيد حجاب

أيه يا بلاد يا غريبة

إيه يا بلاد يا غريبة .. عدُوة ولا حبيبة؟


في الليل تصحي عيونِك .. و نجومِك مش قريبة


بلاد معرفش ناسها .. و لا عارفاني بيبانها


و ماليش شبر في أساسها .. و لا طوبة في حيطانها


و خطاويَّه غريبة



عالَم رايحة و جايّة .. و أنا مين و فين مكاني؟


و إيه آخر الحكاية؟ و إيه اللي رماني؟


يا خطاويَّه الغريبة



دنيا ولا متاهة؟ دايرة و بندور وراها


في صبحها و مساها .. آهة و راها آهة


يا خطاويَّه الغريبة


سيد حجاب

أرابيسك

و ينفِلِت من بين إيدينا الزمان


كإنه سَحبة قوس في أوتار كمان


و تنفرط الايام عود كهرمان


يتفرفط النور و الحنان و الأمان


و ينفلت من بين إيدينا الزمان




الشر شرق و غرب داخل في حوشنا


حوشوه لا ريح شاردة تقشقش عشوشنا


حوشوا شرارة تطيش تشقق عروشنا


و تغشنا المرايات تشوش وشوشنا


و تهيل تراب ع الهالة و الهيلمان




الغش طرطش رش ع الوش بوية


ما درتش مين بلياتشو أو مين رزين


شاب الزمان و شقيت .. مش شكل أبويا


شاهت وشوشنا تهنا بين شين و زين


ولسه ياما و ياما حنشوف كمان

يا مصرى

يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
يا مصرى قوم هش الوطاويط...كفاياك تبليط
صعبه الحياه والحل بسيط...حبة تخطيط
........................
فتحت باب إستيرادك
وصرفت فوق ضعف إيرادك
حلى للخواجه إستكرادك
سابك بتقرا فى أورادك
وده أشطك ونزل تشفيط
...................
يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
...................
ومهولاتى تحب تزيط
ساعة الفرح زغاريط تنطيط
وفى المياتم هات يا صويت
وفى المظاهرات سخن تشيط
وفى الانتخاب تنسى التصويت
...................
يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
.....................
وليه بترشى وتتساهل
وتبيع حقوقك بالساهل
تستاهل النار تستاهل
ياغويط ويحسبك الجاهل
ساهل وساهى وغبى وعبيط
..................
يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
.....................
يا مصرى يا اللى الغلا عصرك
والنهب فى عصرك حاصدك
قوم للحياه وأسبق عصرك
ولا حاجه هاترجع مصرك
إلا أن تكون شغال ونشيط
......................
يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
يا مصرى قوم...هش الوطاويط...كفاياك تبليط
صعبه الحياه والحل بسيط...حبة تخطيط

أراجوز

أراجوز .. أراجوز .. إنما فنان

فنان .. أيوه .. إنما أراجوز

و يجوز يا زمان أنا كنت زمان

غاوي الأرجزة طياري .. يجوز

إنما لما الكيف بقى إدمان

باجي أبص لشيء واحد أرى .. جوز

أرى إيه؟ أرى إيه؟ أرى أرى أراجوز

***

فلسان .. كحيان .. أيوه أنا فلسان

إنما برضك .. راجل إنسان

بأضرب بالألف لسان و لسان

و باكلها بعرقي .. و مش إحسان

راجل و الرجولية لا عضلات

و لا ألابندة و سيما و حركات

الرجولية الحقيقية ثبات

قدام جبونية أي جبان

****

أراجوز أنا و أحمي أرى أرى إيه؟

أحمي قراريط الناس من مين؟

من الناس الأرى أرى إيه أرى إيه؟

من الناس القراميط الملاعين

ماهو أصل أنا مش من الأرى أرى إيه

مش من القراطيس

و لو الحال مال مقعدش أنا على

أرى إيه أرى إيه؟ .. قرافيصي و أطنش ع الأندال

لازم أشك الأندال مهموز

و أدوس ع اللي افترى و العنطوز

م أنا أرى إيه أرى إيه؟؟ أرى أرى أراجوز

****

أراجوز .. و شجيع .. و الدنيا ميدان

فارس .. حارس .. واقف ددبان

و إذا بان للشر نيبان و زبان

باحمي الغلبانة و الغلبان

و شجاعتي ماهياش في الطاخ طيخ

دي شجاعة تفكير و تماخيخ

الأرض أضربها تجيب بطيخ

بذكاوتي و أخللي الخلا بستان

****

أراجوز أنا .. و الدنيا أرى إيه؟

قرشانة و احنا شبر شبيط

ياما قرمتني و أرى أرى إيه؟

قرصتني ف لباليبي و أنا كبير

فسرحت أنفخ أرى إيه أرى إيه؟

أراغيلها و أغني يا ليلي يا عين

و أتمسخر على أرى إيه أرى إيه؟

أراذلها الفجرة الطماعين

و أضَّحَك كل صبي و عجوز

ع اللي بيتنطط فرقع لوز

مانا أرى أرى إيه؟ أرى أرى أراجوز

****

أراجوز .. و سايقها هبل في جنان

و أنا قلبي .. ملان جدعنة و حنان

و أبان ساهي سهتان سهيان

إنما عقلي للعدل .. ميزان

أنا فلتة .. إنما مش فلتان

و ساعات حرنان .. و ساعات زنَّان

يمكن علشان وحداني .. ما ليش أراجوزة تاخدني بالأحضان

****

أراجوز أنا .. و أقدر أرى أرى إيه؟

أراعيكي و أشيلك في عيوني

و إذا مرة زعلتي أرى أرى إيه؟

أراضيكي بعقلي .. و بجنوني

حُطِّي من السما على أرى أرى إيه؟

أراضيّه و اسلِّم لِك أمري

و كُلِي معايا في أرى إيه أرى إيه؟

قروانتي يا كروانة عمري

و بَدَل مانا كده ملوي الَبَزبوز

أصبح لك جوز معزوز محظوظ

إيه يا ترى إيه؟ أرى أرى أراجوز

أرى إيه؟ أرى إيه؟ أرى أرى أراجوز


سيد حجاب

الأصدقاء

آدي إيدي مِد إيدك ... جرحي جرحك عيدي عيدك

ود دافي .. نبع صافي ... شيء كأنه نيل موافي
من وريدي و من وريدك ... يا صديقي مِد إيدك

يا صديق عمري يا صاحب ذكرياتي ... إنتَ كنز أيامي تحويشة حياتي
و مراياتي اللي باشوف جوّاها ذاتي ... و تواجهني بعيبي تكشف سيئاتي
تِقسى بحنان و استزيدك ... يا صديقي مِد إيدك

أصدقاء و الود موصول فوق زمانّا ... بيه آمنّا و له آمنّا و فيه أمانّا
بيه على الدنيا و ع الدهر استعانّا ... و إن زمنّا خانّا و في لحظة طعنّا
تستعيعدني و استعيدك ... يا صديقي مِد إيدك

النهاية:ـ


آدي يدّي مد يدك ... قد ودك قلبي ودّك
د انتَ بعد الأهل أهلي .. و اذا يوم قلبك ندهلي
حتلاقيني بقلبي عندك .. يا صديقي مد يدك

يا صديق عمري و أحلامي و عذابي ... في ليالي فرحتك عامل حسابي
في ليالي وحدتي بتدق بابي .. و عمر باب قلبي ما صدّك
يا صديقي مد يدك

أصدقاء و الود موصول فوق ظروفنا .. مهما نبعد مهما طوفنا مهما شفنا
في ساعات شدتنا و قلقنا و خوفنا ... تستعيدني و استردّك
يا صديقي مد يدك
سيد حجاب

هنا القاهرة

هنا القاهرة




هنا القاهرة الساحرة الآسِرة الهادرة الساهرة الساترة السافرة


هنا القاهرة الزاهرة العاطرة الشاعرة النيّرة الخيّرة الطاهرة


هنا القاهرة الساخرة القادرة الصابرة المنذرة الثائرة الظافرة



صدى الهمس في الزحمة و الشوشرة


أسى الوحدة في اللمة و النتورة


هنا الحب و الكدب و المنظرة


نشا الغش في الوش و الإفترا


هنا القرش و الرش و القش و السمسرة


هنا الحب و الحق و الرحمة و المغفرة



و انا ف قلب دوامتك الدايرة بينا


بصرّخ بحبّك يا أجمل مدينة


يا ضحكة حزينة .. يا طايشة و رزينة


بحبّك و اعفّر جبيني في ترابك


و اعيش في رحابِك و أقف جنب بابك


جنايني أروي بالدم وردة شبابك


يا زينة جنينة حياتنا اللعينة


بحبّك يا بنت اللذين


بحبّك
سيد حجاب

القهوة

القهوه تحبّ كنكه

والكنكه تحب كنبه

والكنبه تحب قعده

مبسوطة مربّـعه

وكـنّـا أربـعـه

أنا وانتِ وأنا وانتِ

*****

وكنا عيون كتير

وطبلـيّـه وزير

ولا بنحبّ نبكي

ولا بنعرف نطير

أنا وانتِ وأنا وانتِ

*****

سبنا البوسطه ورانا

في الترماي اللي داير

العـتـبـه للإمـام

كان ريقك جنبي ساكت

حـبّـيـتك من زمان

أنا وانتِ وأنا وانتِ

*****

شـمّـيت لادن سعيد

شـمّـيـته من بعيد

شـمّـيـته من قريّب

خمس سنين حاغـيّب

على الشماعه خايـف

وباخاف على الدولاب

وبادوب على البـلاط

وباحسّ الظـله تـقلت

وباسـمع الوابـور

وباحسّ المـيّـه تقلب

أنا وانتِ وأنا وانتِ

*****

الظُهر الشمس تلحس

الظله في الليمـان

والظهر الشمس تعمل

سيبرتايه دهـب

بصينا لبعض فيها

ومشينا لبعض نبكي

وقعدنا من التعب

أنا وانتِ وأنا وانتِ

*****

باقول لك إيه باقول لك

حاجيب حاجات قديمه

قلبي كوره شراب

نلعب والا ما نلعب

فرحت لنا المدينه

وامبارح في التراب

أنا وانتِ وأنا وانتِ

*****

وبنفرش ضينا

على ظلّة بعضنا

واحنا بنبرد هناك

علشان ندفا هنا

والقهوه تقول لنا

على بال النار ما تلسع

بتبقى حنـيّـنه

أنا وانتِ وأنا وانتِ


فؤاد حداد

بأفتح لكم قلبي

أنا بافتح لكم قلبي







وانا باكدح إلي ربي







في عيني الشوق وفي وداني







يااهل الله ياأوطاني







ماليش غيركم وطن تاني







ولاصاحب ولامطرح







وانا بافتح







مشيت صحرا بلاواحة







ونار الشمس لواحة







تدلوني علي الراحة







أقول ان الشقا أملح







وانا بافتح







وبين الأرض والنجمة







أروح في الورد والنسمة







تحدثكم حديث نعمة







ونقرا لكم ألم نشرح







وانا بافتح

فؤاد حداد

المراجيحي

الحركة البركه

يا مراجيحي

يا علو حلو

يا مراجيحي

صابحين فاطرين لابسين أخضر

كلنا على بعضنا بندور

لسة امبارح كنت منور

بفلوسي فانوسي الوحاويحي

يا صلاة النبي نازلة وطالعة

عقل وخف ولعب وصنعة

أنا طتاير وفي ريحي القلعة

أنا طاير والقلعة في ريحي

زغروطة في قلبك من جوه

تنده على أش تلاقيه هو

والدنيا تقول لك يا بو قوة

ما أحلي مجاياتي ومراويحي

والهوا على البحري وعلي ودنه

والشاطر أكبر من سنه

والجد يقول أوعي تونوا

واش قد الجد التفاريحي

فؤاد حداد

دي سحالي

أنا حرّه وأموت في الحريّه

ومزاجي أعمل سحلـيّـه

أزحف ع الأرض وع الحيطه

واطلع وانزل واعمل زيطه

واضرب في الشمس طرمبيطه

أنا حره بديلي وبراسي

وماحدّش يكتم أنفاسي

وما احطش ماسك لإحساسي

ولا احط قزاز

ولا أقفل شيش

عقلي يا هزاز

كلّك نغاشيش

وأنا حره أعيش

أنا عاوزه أعيش

أنا بدي أعيش

أنا نفسي أعيش

على كيف كيفي







أنا حرّه وأموت في الحريّه

ومزاجي أعمل سحلـيّـه

أرقع في الشمس الزغروطه

واخد حمام من غير فوطه

أنا حره براسي وبديلي

حره بنهاري وبليلي

حره بمناخيري القطقوطه

أنا حره بخشمي ماهوش خشمك

وما احطش برقع ولا يشمك

ولا احط قزاز

ولا أقفل شيش

عقلي يا هزاز

كلّك نغاشيش

وأنا حره أعيش







أنا حرّه وأموت في الحريّه

ومزاجي أعمل سحلـيّـه

أنا ابقى سحليه وسيمه

ويجيني برص بتاع سيما

وبتاع مزيكا وترا لم لم

واتاوي في حضنه وأنا باحلم

ويقول لي ابتسمي يا بسيمه

وافرحي بالميه وبالخضره

ماتحطيش احمر ولا بودره

ولا احط قزاز

ولا أقفل شيش

عقلي يا هزاز

كلّك نغاشيش

وأنا حره أعيش







أنا حرّه وأموت في الحريّه

ومزاجي أعمل سحلـيّـه

سحليه وحبايبي سحالي

أنا حره بحالي ومحتالي

حرة أصحصح والا أسخسخ

والا أغني وقلبي يشخشخ

أبواب الدنيا فاتحه لي

ما اقعدشي في الأوده لوحدي

وما احطش إيدي على خدي

ولا احط قزاز

ولا أقفل شيش

عقلي يا هزاز

كلّك نغاشيش

وأنا حره أعيش

أنا عاوزه أعيش

أنا بدي أعيش

أنا نفسي أعيش

على كيف كيفي

فؤاد حداد

رسالة من الحمام

رساله من الحمام







فى المسجد الحرام







من أرض الراشدين







تهدى صلاح الدين







والقاهرة







سلام







جت فى ساعة ندى







الفجر اللى ابتدا







يشق من المشارق







على طول المدى







وطيبت حنين







اخواتها الفرحانين







فى مادنة الأمام







رساله من الحمام..







أنا من أرض النبى







وقلبى حن بـى







الى السيف اللى دمر







الظلم الأجنبى







يايوسف الأمين







يادرع المسلمين







متبارك المقام







رساله من الحمام







عن حبـى لاتسـل







كلمتـك بالمثـل







وعرفتك من جراحك







ياقاطف العسل







تشفى المستضعفين







ترفع عن البـنين







مشـقة الأنتقـام







رساله من الحمام

*****







رساله من الحمام







فى المسجد الحرام







من أرض الراشدين







تهدى صلاح الدين







والقاهرة







سلام


فؤاد حداد

دا شعب فقرى

نظرا لأن النعمة فاقت حدها


ولأننا مش قدها


ولأن فعلا انجازاتك ..



فوق طاقتنا نعدها


ولأننا غرقنا في جمايل ..



مستحيل حنردها


نستحلفك ....... نسترحمك


نستعطفك ....... نستكرمك


ترحمنا من طلعة جنابك حبتين


عايزين نجرب خلقة تانية


ولو يومين


اسمع بقى

إحنا زهقنا من النعيم


ونفسنا في يومين شقا


عايزين نجرب الاضطهاد


ونعوم ونغرق في الفساد


بيني وبينك حضرتك


دا شعب فقرى مايستحقش جنتك


أنا عارْفُهْ شعب ماينفعوش


إلا شارون وبلير وبوش


عايز يجرب الامتهان


ويعيش عميل للأمريكان


بيمد "غازه" لإسرائيل


ويومين كمان ويمد نيل


أهو يعنى نشرب ميه واحدة


ندوب في بعض


ماء وماء وماء


ونفض سيرة الانتماء


وبلاها نعرة وطنطنة


تبقى البلاد "مستوطنة"


(متسلطنة بالسرطنة)


إيه اللي خدناه م الكرامة والإباء


حبة خطب وكلام...كلام


إحنا راهننا على النظام


ورضينا بخيار السلام


بخيار حنسد عين الشمس بيه


علشان مايطلعش النهار


ويطلع لمين؟


حبة معارضة مغرضين؟


وحسب بيان السلطة ..



شلة مأجورين؟


ياعم فضك سيرة


وارضى بقسمتك


دا شعب مش فاهم أكيد


يالا اطرده من رحمتك


وإن كنت غاوي الحكم ..



خليك مطرحك


حاغطس واقب وأعود ..



بشعب يريحك


راضى وعمره مايجرحك


أخْرَس ومايسمعش


وأعميلك عينيه


مش كل قرش يبص فيه


مايقولش لأه، وفين، وليه


يضرب ينفض في السليم


وعلى الصراط المستقيم


كل اللي يعرف ينطقه


عاش الزعيم


يحيا الزعيم

أحمد فؤاد نجم

طاطي راسك

طاطي راسك طاطي طاطي .. انت ف وطن ديمقراطي .. انت بتنعم بالحرية .. بس بشرط تكون مطاطي
لما تكون شغال بذمة .. خايف على مصلحة الأمة .. شغلك يطلع من غير لازمة .. علشان مبيعلاش غير واطي طاطي راسك طاطي طاطي .. انت ف وطن ديمقراطي

لما حاميها يكون حراميها .. وبلاده ورا ضهره راميها .. طالع نازل واكل فيها .. مسنود بالبدلة الظباطي طاطي راسك طاطي طاطي .. انت ف وطن ديمقراطي

لما شقاك يصبح مش ليك .. فقرك سد السكة عليك تتلفّت تلقى حواليك .. إما حرامي و إما عقاطي طاطي راسك طاطي طاطي .. انت ف وطن ديمقراطي

لماتلاقي بلاد الدنيا .. فيها البني آدم حاجة تانية .. وانت في الطبقات الدنيا .. قرد مسلسل أو وطواطي طاطي راسك طاطي طاطي .. انت ف وطن ديمقراطي

لما الجهلة يبقوا أمامك .. أو فوقك ماسكين ف زمامك .. ويسوقك ع الهلكة إمامك .. تشرب م السم السقراطي طاطي راسك طاطي طاطي .. انت ف وطن ديمقراطي

لما الكلمة تكون بتدينك .. لما تخبي ف قلبك دينك .. لما الذل أشوفه ف عينك .. هات إحباطك على إحباطي طاطي راسك طاطي طاطي انت ف وطن ديمقراطي .. انت ف وطن ديمقراطي

فؤاد حداد - فتفوتة شجن

لوان.. يا حلوان.. يام مصانع الحديد والشمس الحامية.. على أسلفت الأتوسطراد فى طريقك لهيب ما بيبرد إلا بالليل.. مايطفيهوش مية النيل.. ومصانعك الأسمنت بتشغى غبار غطى كل شئ حتى الشجر.. وبقى زى ورق مفضض بيلمع تحت الشمس.. وكل حارة ضيقة فيكى وفى طرة والمعصرة فيها نسمة هوا باقية من ليالى قديمة.. بس اللى بيضرب بفاسه حجر تلالك بإيدين من نار.. والعمال اللى بيسيل عرقها على مكنك.. إيه اللى ممكن ينسيهم حر الشمس غير الغنا الشجى؟
*
يا كلهم عارف إني أنا وهما
لا غبار المصانع
مئات الغيطان
مسيل المدامع
الليل الغميق أرغولنا
الشمس بتغزل على نولنا
طلي وباركي
في الناس اللي بيغنوا لنا
ملك ذراعي
هدهد كركري
لازق علي دماغي
حبة شمس وحبة ليل
شجر الشارع
نازل طالع
وانا بازقق فراخي
واغني سوابق

احمد فؤاد نجم

الخط دا خطي
والكلمة دي
ليا
غطى الورق غطي
بالدمع يا عنية
شط الزتون شطي
والارض عربية
نسايمها انفاسي
وترابها من ناسي
وان رحت انا ناسي
ما تنسانيش هى
والخط دا خطي
والكلمة دى ليا
لاكتب على عينى
يحرم عليكى النوم
واحبس ضيا عينى
بدموعى طول اليوم
قبل الوفا بديني
زي الصلا والصوم
والدين فى عرف الحر
هم ومذلة ومر
وشجون تصون وتجر
احزان مخبية
والخط دى خطي
والكلمة دى ليا
لاكتب على كفي
والحبر من دمي
ياهمتي كفي
يا عزوتى ضمي
اول ما ح نوفي
بالوعد
ح نسمي
باسم اللى ماتوا صغار
فى المدرسه والدار
والمصنع اللي انهار
فوق الصنا يعية
والخط دا خطي
والكلمة دى ليا

الخط دا خطي

الأخلاق

مناعه ارزاق
جلابة ارزاء
يا سخامه يا لطامه
ياللى اسمك اخلاق
ازيك وايش حالك
ايه اخر الانباء
دجوكى ؟
سلخوكى ؟
خلوكى اشلاء
ما انا قايل وسمعتي
بس انتي اللى طمعتى
فى بلدنا يعوزكي
مسكوكي دقوكي
بدماغ الدقماق
بالقاضيه الفنيه
صرعوكى السجانه
حبوسكى
فى قضيه
مرفوضه وخسرانه
والتهمه الجنائيه
اكمنك انسانه
وخدوكى الشرطيه
وعساكر هجانه
وابولكنه فرنساوي
طبال ومغناوي
بيغنى اشتراكاوى
والعالم طرشانه
وابو عسكر حرميه
بيبرطع فى تكيه
ويقول اشتركيه
والناس
لسه جعانه
يا هبيله يا فضيله
يابتاعه المهابيل
بلا وكسه
بلانيله
بلا هفه مخاليل
دى بلدنا
ولا حولا
ما بقاش فيها علاوله
وعوضنا على المولي
فى ولادنا الشماليل
يادينا ورجلينا
اسسنا وعلينا
وعملنا اللى علينا
جيل يطلع ورا جيل
ويقول ابنوا لبكره
والبنى ادم ذكري
نتحمس للفكرة
من كتر التطبيل
واخيرا ولا اخر
اخلاقنا بتتاجر
ومهازل
ومساخر
وهزيمه
وتضليل


احمد فؤاد نجم

شقع بقع

انا الأديب و لا تعرفنيش
تقرالي لكن ما تشوفنيش
كلامي لا هو مادهون ورنيش
و لا المعاني عليها غبار
شقع بقع يا ديل الفار

***
يا شعب مصر يا خم النوم
ما تفوق بقى و تشوف لك يوم
الثورة قامت في الخرطوم
و انت اللي نايم بالمندار
شقع بقع يا ديل الفار
***
يا شعب ثور داهية تسمك
و شيل اصول اسباب همك
عصابه
بتمص في دمك
و الاسم قال ضباط احرار
شقع بقع يا ديل الفار
***
اخدوا اليهود غزة و سينا
و بكرة يبقوا وسطينا
و الراديوهات بتغدينا
خطب و نتعشى اشعار
شقع بقع يا ديل الفار
***
الشيخ امام قال كلمة حق
و الست ثومة قالت لأ
و ابو النجوم على ودنة اندق
في المعتقل و الدنيا نهار
شقع بقع يا ديل الفار


احمد فؤاد نجم

بقرة حاحا

بقرة حاحا




ناح النواح و النواحة





على بقرة حاحا النطاحة





و البقرة حلوب .. تحلب قنطار





لكن مسلوب .. من أهل الدار





و الدار بصحاب .. و حدعشر باب (11 باب )





غير السراديب .. و بحور الديب





و غيلان الدار .. واقفين بنهار





و ف يوم معلوم ... عملوها الروم





زقوا الترباس ... هِربوا الحراس





دخلوا الخواجات .. شفطوا اللبنات





و البقرة تنادي .. و تقول يا ولادي





و ولاد الشوم ... رايحين ف النوم





البقرة انقهرت .. م القهر انصهرت





وقعت بالبير .. سألوا النواطير :





طب وقعت ليه ..؟





وقعت م الخوف





و الخوف يجي ليه .. ؟





من عدم الشوف











و قعت م الجوع و م الراحة





البقرة السمرا النطاحة





ناحت مواويل النواحة





على حاحة و على بقرة حاحا
احمد فؤاد نجم

يا فلسطينية

يا فلسطينية و البندقاني رماكو ..





بالصهيونية تقتل حمامكو فِ حماكو





يا فلسطينية و أنا بدي أسافر حداكو





ناري بإيديا و إيديا تنزل معاكو





على راس الحية و تموت شريعة هولاكو





............





يا فلسطينية و الغربة طالت كفايا





و الصحرا أنّت من اللاجئين و الضحايا





و الارض حنّت للفلاحين و السِقايا





و الثورة غاية و النصر أول خطاكو





........





يا فلسطينية و الثورة هيَّ الاكيدة





بالبندقية نفرض حياتنا الجديدة





و السكة مهما طالت و بانت بعيدة





مد الخطاوي هو اللي يسعف معاكو





.........





يا فلسطينية فيتنام عليكو البشارة





بالنصر طالعة من تحت مية ألف غارة





و الشمعة والعة و الامر كان بالخسارة

راجعين حيارى عقبال ما يحصل حداكو


احمد فؤاد نجم

الممنوعات

ممنوع من السفر

ممنوع من الغنا

ممنوع من الكلام

ممنوع من الاشتياق

ممنوع من الاستياء

ممنوع من الابتسام

وكل يوم فى حبك

تزيد الممنوعات

وكل يوم باحبك

اكتر من اللى فات

حبيبتى يا سفينه

متشوقه و سجينه

مخبر فى كل عقده

عسكر فى كل مينا

يمنعنى لو أغير

عليكى أو أطير

بحضنك

أوأنام

فى حجرك الوسيع

وقلبك الربيع

اعود كما الرضيع

بحرقة الفطام

حبيبتى يا مدينه

متزوقه وحزينه

فى كل حاره حسره

وف كل قصر زينه

ممنوع من انى اصبح

بعشقك او ابات

ممنوع من المناقشه

ممنوع من السكات

وكل يوم فى حبك

تزيد الممنوعات

وكل يوم بحبك

اكتر من اللى فات

هما مين و إحنا مين

.

هما مين و إ حنا مين .. ؟

هما الأمرا و السلاطين ..

هما المال و الحكم معاهم ..

و إحنا الفقرا المحرومين

حزر فزر شغّـل مخك

شوف مين فينا بيحكم مين ؟!!

..............

إحنا مين و هما مين ..

إحنا الفعلا البنايين

إحنا السنة و إحنا الفرض

إحنا الناس بالطول و العرض

من عافيتنا تقوم الارض ..

و عرقنا يخضر بساتين

حزر فزر شغل مخك

شوف مين فينا بيخدم مين ..؟؟!!

................

هما مين و إحنا مين ؟؟

هما الامرا و السلاطين

هما الفيلا و العربية

و النساوين المتنقية

حيوانات استهلاكية

شغلتهم حشو المصارين

حزر فزر شغل مخك

شوف مين فينا بياكل مين ..؟؟!!!

....................
إحنا مين و هما مين

إحنا قرنفل على ياسمين

إحنا الحرب : حطبها و نارها

و إحنا الجيش اللي يحررها

و إحنا الشهدا بكل مدارها

منكسرين أو منتصرين

حزر فزر شغل مخك

شوف مين فينا بيقتل مين ..؟؟!!!

................

هما مين و إحنا مين

هما الامرا و السلاطين

هما مناظر بالمزيكا

و الزفة و شغل البوليتيكا

و دماغهم طبعاً استيكا

بس البركة بالميازين

حزر .. فزر شغل مخك

شوف مين فينا بيخدع مين ..؟؟؟!!!

.....................

هما مين و إحنا مين

هما الامرا و السلاطين

هما بيلبسوا أخر موضة

و إحنا بنسكن سبعة في أوضة

هما بياكلوا حمام و فراخ

و إحنا الفول دوخنا و داخ

هما بيمشوا بطيارات

و إحنا نموت بالاوتوبيسات

هما حياتهم بامب جميلة

هما فصيلة و إحنا فصيلة

حادي يا بادي يا عبد الهادي

يا اللي عليك قصد الغنوادي ( الغنوة دي أو هذه الاغنية )

لما الشعب يقوم و ينادي

يا إحنا يا هما في الدنيا دي

حزر فزر .. شغل مخك

شوف مين فينا حيغلب مين

احمد فؤاد نجم

غابة

غابة كلابها ديابــــا ... و نازلين في الناس هـم
و اللي ينام في الغابة ... رح يتاكل هــــــــم
و اللي يدور وشـــــو ... في غمضة عين يتهــــــم





و اللي يغيب عن جحرو .. لاجل القوت و المم
يتخان من ورا ظهرو ... او يتاخد خم
غابة بتاكل ميتة ... غابة بتشرب دم


غابة كلابها ديابا ... نازلين بالناس هم
غابة و ناسها غلابة .. خيخة لا ناب و لا فم
متكلين عالصدفة .... متاكلين بالهم


و احنا يا ملح الغابة .. هم يحرك هم
ضايعين و سط ديابا .. مش فاضيين نهتم
فاهمين و بنتغابا ... مش راضيين نتلم







غابة كلابها ديابــــا ... و نازلين في الناس هـم
و اللي ينام في الغابة ... رح يتاكل هــــــــم
و اللي يدور وشـــــو ... في غمضة عين يتهــــــم





و اللي يغيب عن جحرو .. لاجل القوت و المم
يتخان من ورا ظهرو ... او يتاخد خم
غابة بتاكل ميتة ... غابة بتشرب دم


غابة كلابها ديابا ... نازلين بالناس هم
غابة و ناسها غلابة .. خيخة لا ناب و لا فم
متكلين عالصدفة .... متاكلين بالهم


و احنا يا ملح الغابة .. هم يحرك هم
ضايعين و سط ديابا .. مش فاضيين نهتم
فاهمين و بنتغابا ... مش راضيين نتلم


احمد فؤاد نجم

يا عرب

يا عرب .. يا عرب .. يا عرب في أي مصر

يا عرب .. يا عرب .. اسمعوا صوت شعب مصر

أحفظوا لمصر المكان .. و احنا عالعهد اللي كان

مصر أوفى من الزمان ..
و انتو عارفين شعب مصر

يا عرب يا عرب يا أهل مصر

----------------------------







اللي خانوا العهد بينا .. و استباحوا كل حاجة







و استهانوا بالعروبة .. و استكانوا للخواجة







مستحيل حيكونوا منا .. نحنا حاجة و هما حاجة







هما باعوا الجلابية .. و الوطن و البندقية







و ا حنا أصحاب القضية ..







احنا ما بنبيعش مصر

يا عرب يا عرب يا أهل مصر
----------------------------

يطلع الدجال بزيفو .. يملا وادي النيل ضباب

ينزل الجلاد بسيفو ... يزرع الموت و الخراب

يطول الليل زي كيفو .... الصباح له ألف باب

و احنا بوصلتنا بإيدينا .. ما تخافوش من الليل علينا

مهما غبتو عن عينينا ..

انتو جوا بقلب مصر

يا عرب يا عرب يا أهل مصر

-------------------------

سينا و لا .. يافا و لا .. حيفا ولا ... دير ياسين

اسألوا الشمس اللي هالة .. عللي صحيوا مبدرين

يزرعوها نور و غلة .. دول جدودنا و لا مين ؟

حقنا و حتما ً يُعاد .. بس لو بانت سعاد

و البيان ده لوه معاد ...

و المعاد حيكون في مصر

يا عرب يا عرب يا أهل مصر

احمد فؤاد نجم

بيان بدء الربيع

بيان بدء الربيع
على مستواك يا نظر
يافطة تسد القمر
إعلان لفيلم جديد
"عودة رعاة البقر"
عودة بريطانيا تاني
في الشكل الأمريكاني
صوت النشرة الكئيبة
يقطع كل الأغاني
التكنولوجيا التمام
تكنيك فشر فيتنام
تفوق حرب الكواكب
راحت على الألغام
كل البلاد بتشارك
أضخم إنتاج معارك
ولا شيء يقف قصاده
لا رقابة ولا جمارك
أمريكا طالعة تذيع
بيان بدء الربيع
تصبح على خير يا عالم
سنة سودة على الجميع
الحرب جاية جاية
إن شالله بقيصرية
ده قصف أمريكاني
يعني أكبر هدية
بغداد أيا بغداد
حِمل الكآبة زاد
ومعايا بعد الله
أشعار فؤاد حداد
أنا مش خايف نهايتي
مستني الوقت يأتي
فن الإجرام هوايته
والموت أصبح هوايتي


أحمد حداد

حارتنا

[ _ حارتنا

_ مجاري وناموس

_ مرايه وفانوس

_ حجاره وكراسي

_ شباب ع النواصي

_ دقون ع الكروش

_ عرق ع القروش

_ شقوق في البيوت

_ بيوت في الشقوق

_ مساء تموت

_ صباحا تفوق

_ قديمه وغبيه

_ لبيبه وصبيه

_ في ضيق خرم ابره

_ في غوط المحيط

_ على الذل صابره

_ دا صبر الغويط

_ أسانس البلاده

_ معسكر ولاده

_ خسيسه وجبانه

_ جريحه ومهانه

_ ما تسمعش ندهه

_ رنين الدفوف

_ بتاكل ولادها

_ حتولد الوف

_ مادمنا ضعنا فيها

_ ضروري نلاقيها

...

حارتنا في الحواري

على علم الصواري

لو قال فوقها

الكناري

تتهز المشربيه

ياحوش ادم

يادارنا

يا ساكن حضن جارنا

سيدنا الحسين تبارك

شهيد الانسانيه

مدد سيدنا وشهيدنا

ياقايل ومواعدنا

يكون عيدك

وعيدنا

يوم طلعة شمس جايه

...ياحاره جوا حاره

يا مجمع السهاري

من كل حي

حاره

في الحضره الادميه

مدد انس الحبايب

مدد حاضر وغايب

مدد زين الصحايب

ياساده يا موجيه

...

فيك العيدان هزيله

شايله الحمول تقيله

ولا باليد حيله

ولا الايام هنيه

سيدنا الدردير يا بابا

مدد يابو الغلابه

فوق الحواري غابه

بتمص الادميه

...

صبحك صبايا صاحيه

هاللين من كل ناحيه

مدد ياسيدي يحيى

توعدنا باللي هي

ياحارتنا

يام شيله

هزي الهلال

وهيلا

قدامك يوم وليله

ع الفرحه


أحمد فؤاد نجم

رباعيات

خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه ؟
عجبي !

ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !

ياما صادفت صحاب و ما صاحبتهمش
و كاسات خمور و شراب و ما شربتهمش
أندم علي الفرص اللي انا سبتهم
و الا علي الفرص اللي ما سبتهمش
عجبي

و الكون ده كيف موجود من غير حدود
و فيه عقارب ليه و تعابين ودود
عالم مجرب فات و قال سلامات
ده ياما فيه سؤالات من غير ردود
عجبي

أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي

يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي

أحب أعيش ولو في الغابات
أصحي كما ولدتني أمي و ابات
طائر .. حيوان.. حشرة .. بشر ..بس أعيش
محلا الحياة.. حتي في هيئة نبات
عجبي

سهير ليالي و ياما لفيت و طفت
و ف ليه راجع في الضلام قمت شفت
الخوف ... كأنه كلب سد الطريق
و كنت عاوز أقتله .. بس خفت
عجبي

كان فيه زمان سحليه طول فرسخين
كهفين عيونها و خشمها بربخين
ماتت لكين الرعب لم عمره مات
مع إنه فات بدل التاريخ تاريخين
عجبي

عجبتني كلمة من كلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنا كل قلب دخلت فيه اتحرق
عجبي

رقبه قزازة و قلبي فيها انحشر
شربت كاس و اتنين و خامس عشر
صاحبت ناس م الخمرة ترجع وحوش
و صاحبت ناس م الخمرة ترجع بشر
عجبي

ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي

ورا كل شباك ألف عين مفتوحين
و انا وانتي ماشيين يا غرامي الحزين
لو التصقنا نموت بضربة حجر
و لو افترقنا نموت متحسرين
عجبي

نوح راح لحاله و الطوفان استمر
مركبنا تايهه لسه مش لاقيه بر
آه م الطوفان وآهين يا بر الأمان
إزاي تبان و الدنيا غرقانه شر
عجبي

علي رجلي دم .. نظرت له ما احتملت
علي إيدي دم.. سألت ليه ؟ لم وصلت
علي كتفي دم.. و حتي علي رأسي دم
أنا كلي دم .. قتلت ؟ ..... والا اتقتلت
عجبي

انا كل يوم أسمع ........ فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
عجبي

ينبوع و في الحواديت أنا سمعت عنه
إنه عجيب .. و ف وسط لهاليب لكنه
شقيت كما الفرسان طريقي .. لقيت
حتي الخنازير و الكلاب شربوا منه
عجبي

يا قرص شمس ما لهش قبة سما
يا ورد من غير أرض شب و نما
يا أي معني جميل سمعنا عليه
الخلق ليه عايشين حياه مؤلمة
عجبي

شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب و جرحي لهيب
ودواك فرغ مني .... و إيه العمل
عجبي

أعرف عيون هي الجمال و الحسن
و اعرف عيون تاخد القلوب بالحضن
و عيون مخيفة و قاسية وعيون كتير
وباحس فيهم كلهم بالحزن
عجبي

إيش تطلبي يا نفس فوق كل ده
حظك بيضحك و انتي متنكده
ردت قالت لي النفس : قول للبشر
ما يبصوليش بعيون حزينة كده
عجبي

إقلع غماك يا تور وارفض تلف
إكسر تروس الساقية و اشتم وتف
قال : بس خطوة كمان .. وخطوة كمان
يا اوصل نهاية السكة يا البير تجف
عجبي

يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد ... زي الصداع
عجبي

في يوم صحيت شاعر براحة و صفا
الهم زال و الحزن راح و اختفي
خدني العجب و سألت روحي سؤال
أنا مت ؟ و لا وصلت للفلسفة
عجبي

الفيلسوف قاعد يفكر سيبوه
لا تعملوه سلطان و لا تصلبوه
ما تعرفوش إن الفلاسفه يا هوه
اللي يقولوه بيرجعوا يكدبوه
عجبي

علي بعد مليون ميل من أرضنا
من الفراغ الكوني بصيت أنا
لا شفت فرق بين جبال و بحور
و لا شفت فرق ما بين عذاب أو هنا
عجبي

إنسان أيا إنسان ما أجهلك
ما أتفهك في الكون و ما أضألك
شمس وقمر و سدوم و ملايين نجوم
و فاكرها يا موهوم مخلوقه لك
عجبي

نظرت فوق للنجوم و انا ساير
رجليا عترت في الحفر و الحجاير
بقيت أقول و انا ع التراب: يا سلام
مش بس عبره أخذت لكن عباير
عجبي

- يا نجم .. نورك ليه كده بيرتجف ؟
هو انت قنديل زيت ؟ أو تختلف
- أنا نجم عالي .. بس عالي قوي
و كل ما انظر تحت اخاف انحدف
عجبي

السم لو كان في الدوا منين يضر ؟
و الموت لو عدونا .. منين يسر؟
حط القلم في الحبر و اكتب كمان
.. و العبد للشهوات .. منين هو حر؟
عجبي

وقفت بين شطين علي قنطــــــــــــــــــرة
الكدب فين و الصدق فيـــــــــــن يا تري
محتار ح اموت .. الحوت خرج لي وقالي
هو الكلام يتقــــــــــــاس بالمســـــــــــطرة
عجبي

سرداب في مستشفي الولاده طويل
صرخات عذاب ورا كل باب وعويل
.. وفي الطــــــريق متزوقين البنات
متزوقـــــــــــــين للحب و المواويل
عجبي

الدنيا أوده كـــــــــــبيره للانتظار
فيها ابن أدم زيه زي الحـــــــمار
الهم واحد .. و الملل مشــــــترك
و مفيش حمار بيحاول الانتـــــحار
عجبي

أيوب رماه البين بكل العـــــــــلل
سبع سنين مرضان وعنده شلل
الصــــبر طيب .. صبر أيوب شفاه
بس الأكـــــــــاده مات بفعل الملل
عجبي

نسمة ربيع لكن بتكوي الوشـــــــوش
طيور جميلة بس من غير عشـــوش
قلوب بتخفق إنما وحـــــــــــــــــدها
هي الحياه كده .. كلها في الفاشوش
عجبي

يا طير يا عالي في الســــــما طظ فيك
ما تفتكرشي ربنا مصطــــــــــــــــفيك
برضـــــــــــك بتاكل دود و للطين تعًًًًودً
تمـــــــــص فيه يا حلو .. و يمص فيك
عجبي

جالك أوان ووقفت موقف وجـــود
يا تجود بده يا قلبي يا بده تجــــود
ما حد يقدر يبقي علي كل شـــــــئ
مع إن – عجبي – كل شئ موجود
عجبي

جالك اوان وعرفت مشي الجنايــــــــز
كيف شفتها يا عبد رب اللذايــــــــــــذ
قال : شفت شيل بالحيل فقير أو اميـــر
كما شالوا في الخمامير فواضي القزايز
عجبي

أنا كنت شئ و صبحت شئ ثم شــئ
شوف ربنا .. قادرعلي كل شـــــــئ
هز الشجر شواشيه ووشوشني قال :
لابد ما يموت شئ عشان يحيا شئ
عجبي

يا مشرط الجراح أمانة علـــــــــــيك
و انت ف حشايا تبص من حواليــك
فيه نقطة سوده في قلبي بدأت تبان
شيلها كمان .. و الفضل يرجع إليك
عجبي

كيف شفت قلبي و النبي يا طبيــــــــــــب
همد و مات و الا سامع له دبيـــــــــــــب
قاللي لقيته مختنق بالدمـــــــــــــــــــــوع
و ما لوش دوا غير لمسه من إيد حبيب
عجبي

تسلم يا غصن الخوخ يا عود الحطـــــــــب
بييجي الربيع .. تطلـــــــــــع زهورك عجب
و انا ليه بيمضـــــــــــي ربيع وييجي ربيع
و لسه برضك قلــــــــــــــــــبي حتة خشب
عجبي
قلبي عليل يا ناس و في الكاس دواه
مديت له إيدي شربت م اللي حــــواه
جنبي الشمال خف .. اليمين اتــــوجع
و إيه يداوي الكبد م اللي كـــــــــــواه
عجبي

.. دي مزكرات و كتبتها من ســـــــــنين
في نوتة زرقا لون بحور الحنيــــــــــــن
عترت فيها .. رميتها في المهمـــــــلات
وقلت صحيح أما صحيح كلام مخبولين
عجبي

دخل الشتا وقفل البيبان ع البـــيوت
وجعل شعاع الشمس خيط عنكبوت
وحاجات كتير بتموت في ليل الشــتا
لكن حاجات أكتر بترفض تمــــــوت
عجبي

- الدنيا من غير الربيع مــــــــيته
ورقة شجر ضعفـــــــانه و مـــفـــــتــته
- لا يا جدع غلطان تأمل وشوف
زهر الشتا طالع فــــــــي عز الشـــــتا
عجبي

ياللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كـــــبار
و ما لكش غير منقار و قادر تعيش
عجبي

سمعت نقطة ميه جوه المحيـــــــط
بتقول لنقطه ما تنزليش في الغويط
أخاف عليكي م الغرق .. قلـــــت أنا
ده اللي يخاف م الوعد يبقي عبيط
عجبي

مزيكة هادية الكون فيها انغـــــمر
وصيف و ليل و عقد فل و سمر
يا هلتري الناس كلهم مبسوطين
و يا هلتري شايفين جمال القمر ؟
عجبي

إنشد يا قلبي غنوتك للجمــــــــــــــــــال
و ارقص في صدري من اليمين للشمال
ما هوش بعيد تفضل لبكره سعيــــــــــد
ده كل يوم فيه الف الف احتمـــــــــــــال
عجبي

آه لو انا و محبوب جزنا الفضـــــا
في سفينة وحدينا .. واشيا رضـــا
ساعة صفا تعجبنا نرجع لهــــــــــا
و الهم قبل ما ييجي .. يبقي مضـى
عجبي

أنا إله الوجد رب الهيــــــــــــــــام
أضرب بسهم الوهم وهم الغـــــرام
و هم الغرام من كتر ما هو لذيـــــذ
رشقت انا ف صدري جميع السهام
عجبي

حدوته عن جعران و عن خنفســــــــــه
اتقابلوا حوا بعض ساعة مســـــــــــــــا
و لا قال لهم حد اختشوا عيب حـــــرام
و لا حد قال دي علاقة متدنســــــــــــــة
عجبي

ياللي عرفت الحب يوم و انطــــــــــــوي
حسك تقال مشتاق لنبع الهـــــــــــــــوي
حسك تقول مشتاق لنبع الغــــــــــــــــرام
ده الحب .. مين داق منه قطره...ارتوي
عجبي

بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي

فارس وحيد جوه الدروع الحديد
رفرف عليه عصفور وقال له نشيد
منين .. منين.. و لفين لفين يا جدع
قال من بعيد و لسه رايح بعيد
عجبي

كان فيه قمر كأنه فرخ الحمام
علي صغره دق شعاع شق الغمام
أنا كنت حاضر قلت له ينصرك
إشحال لما حتبقي بدر التمام
عجبي

النهد زي الفهد نط اندلع
قلبي انهبش بين الضلوع و انخلع
ياللي نهيت البنت عن فعلها
قول للطبيعة كمان تبطل دلع
عجبي

صوتك يا بنت الإيه كأنه بدن
يرقص يزيح الهم يمحي الشجن
يا حلوتي و بدنك كأنه كلام
كلام فلاسفه سكروا نسيوا الزمن
عجبي

كرباج سعاده وقلبي منه اجلد
رمح كأنه حصان و لف البلد
و رجع لي نصل الليل و سألني .. ليه
خجلان تقول انك سعيد يا ولد
عجبي

الذي عمري اشتياق في اشتيـــاق
و قطر داخل في محطة الـــــــــفراق
قصدت نبع السم وشربت ســـــــــم
من كتر شوقي وعشمي في التريـــاق
عجبي

انا الذي عشت الزمن مضيعـــــــــه
بروح حزينة معفنة مضعضعــــــه
زرعتشجرة سنط لجل انجــــــرح
لقتها شعر البنت و مفرعــــــــــــه
عجبي

لو فيه سلام في الأرض وطمان و أمن
لو كان مفيش و لا فقر و لا خوف جبن
لو يملك الانسان مصير كل شـــــــــــئ
انا كنت اجيب للدنيا ميت ألف ابــــــــــن
عجبي

العشب طاطا للنسايم و نـــــــــــــــــــــخ
أخضر طري مالهش في الحســـــــن أخ
عصفور عبيط انا .. غاوي بهجه و غنا
ح انزلهنا.. و انشا لله يهبرني فــــــــخ
عجبي

أوصيك يابني بالقمر و الزهـــــــــــــور
أوصيك بليل القاهرة المسحـــــــــــــور
و إن جيت في بالك .. إشتري عقد فل
لأي سمرا.. وقبري إوعك تـــــــــزور
عجبي

غمض عينيك و ارقص بخفة و دلع
الدنيا هي الشابة و انت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك ....تـقع
عجبي

زحام و أبواق سيارات مزعجـــــة
للي يطول له رصيف.. يبقي نجـــا
لو كنت جنبي يا حبيبي أنــــــــــــا
مش كنت أشوف إن الحياة مبهجة
عجبي

إيديا في جيوبي وقلبي طــــــــرب
سارح في غربة بس مش مغترب
و حدي لكين ونسان و ماشي كده
وبابتعد ما اعرف .. أو باقـــــترب
عجبي

يا ميت ندامه ع القلوب الخـــــــــــلا
لا محبة فيها و لا كراهـــــــــــه ولا
حتي يا قلبي الحزن ما عادش فيـــــك
معلهش .. لك يوم برضه راح تتملا
عجبي

مرحب ربيع مرحب ربيع مرحبــــــــــه
يا طفل يا للي ف دمي ناغا وحبــــــــا
علشان عيونك يا صغنن هويــــــــــــت
حتي ديدان الأرض و الأغربــــــــــــــة
عجبي

فتحت شباكي لشمس الصبـــــــــــــــــاح
ما دخلش منه غيــــــــــر عويل الريـــاح
و فتحت قلبي عشان ابوح بالألـــــــــــــم
ما خرجش منه غير محبه و سمــــــــاح
عجبي

غمست سنك في السواد يا قلـــــــــــــــم
عشان ما تكتب شعر يقطر ألــــــــــــــــم
مالك جرالك إيه يا مجنون ... و ليــــــــه
رسمت ورده وبيت و قلب و علـــــــــــم
عجبي

حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
عجبي

يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
عجبي

ولدي نصحتك لما صوتي اتنبــــــــــــح
ما تخفش من جني و لا من شبـــــــــح
و ان هب فيك عفريت قتيل إسألـــــــــه
ما دافعش ليه عن نفسه يوم ما اندبح
عجبي

ولدي إليك بدل البالون ميت بالــــــون
انفخ وطرقع فيه علي كل لـــــــــــون
عساك تشوف بعينك مصيرالرجــــــال
المنفوخين في السترة و البنطلـــــون
عجبي

خوض معركتها زي جدك ما خــــاض
صالب و قالب شفتك بامتـــــــــــعاض
هي كده...ما تنولش منها الأمـــــــل
غير بعض صد ورد ووجاع مخاض
عجبي

كام اشتغلت يا نيل في نحت الصخور
مليون بئونه و الف مليون هاــــتور
يا نيل أنا ابن حلال و من خلفتــــــك
و ليه صعيبه علي بس الأمــــــــور
عجبي

منين أجيبها كلمه متألمـــــــــــــــــة
لعيبه فايره حايره و مصممــــــــــه
منين اجيبها كلمه تكون بنـــت ارض
تشفي اللي ما شافهوش كلام السمـا
عجبي

أنا قلت كلمة و كان لها معنييـــــــــن
كما بطن واحده و توأمين زي وشين
لو دنيا شر.. التوأم الخير يمـــــــوت
لو دنيا خير .. الشر ح يعيش مــنين
عجبي

أنا اللي بالأمر المحال اغتــــــــــــوي
شفت القمر نطيت لفوق في الهـــــوا
طلته ما طلتوش إيه انا يهمنـــــــــي
و ليه .. ما دام بالنشوة قلبي ارتوي
عجبي

بره القزاز كان غيم و أمطار و بــــــــرق
ما يهمنيش – أنا قلت – و لا عندي فرق
غيرت رأيي بعد ساعة زمـــــــــــــــــان
و كنت في الشارع .. و في الجزمة خرق
عجبي

عيني رأت مولود علي كتف أمـــــــــــه
يصرخ تهنن فيه يصرخ تضــــــــــــمه
يصرخ تقول يا بني ما تنطق كـــــــلام
ده اللي ما يتكلمش يكتر همـــــــــــــه
عجبي

يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنمــــــــــا
كتم الغنا هو اللي ح يموتــــــــك
عجبي

ياللي بتبحث عن إله تعــــــــــــبده
بحث الغريق عن أي شئ ينجـــده
الله جميل و عليم و رحمن رحــيم
أجمل صفاته .. وانت راح توجده
عجبي

حقرا و فوق كوكب حقير محتقـــــــر
في الكون تكون دنياكو إيه يا بــــــقر
رملايه من صحرا ؟ لكين إيش تقول
و الكون بحاله جوه عقل البشــــــر
عجبي

لا تجبر الانسان و لا تخـــــــــيره
يكفيه ما فيه من عقل بيحيــــــره
اللي النهارده بيطلبه و يشتهــــيه
هو اللي بكره ح يشتهي يغيـــــره
عجبي

ياللي في حماه الشمس تلقي المــــلاذ
و ألف بكره و بكره .. في ضلوعه لاذ
مين أنت ؟ مارد ؟ رب ؟ قال لأ ده بس
انا اللي باروي القمح و اسقي الفــولاذ
عجبي

غسل المسيح قدمك يا حافي القـدم
طوبي لمن كانوا عشانك خــــــــدم
صنعت لك نعليك أنا يا أخــــــــــــي
مستني إيه .. ما تقوم تدوس العدم
عجبي

طال انتظاري للربيع يرجــــــــــــــع
و الجو يدفا و الزهور تطلــــــــــــع
عاد الربيع عرمرم شبـــــــــــــــاب
إيه اللي خلاني ابتديت افــــــــزع ؟
عجبي

و لو اتضنيت و فنيت وعمري انفرط
مش عاوز الجأ للحلول الوســـــــــط
و كمان شطط و جنون مانيش عــاوز
يا مين يقول لي الصح فين والغلــــط
عجبي

عاد الربيع كأنه طعم الحــــــــــــــــــب
و الحب نار جوه العروق بتصـــــــــب
اتمتع ازاي بيه وانا متقطـــــــــــــــع
من كتر خوفي لا في الخطيئة يطب ؟
عجبي

ازاي شبابنا يقوم و ياخـــــــــد دوره
من غير صراخ يئذيه و يجرح زوره
يا هلتري أحسن له يقعد ساكـــــــــت
أو ينترك و لو خرج عن طــــــوره ؟
عجبي

عيني رأت عصفور ووياه ابـــــــــنه
بيحدفه في الريح و ياخده ف حضنه
نوبتين و تالت نوبه – عجبي عليهم –
كانوا سوا بيرفرفرا و يغنـــــــــوا
عجبي

احسن ما فيها العشق و المعشقــــــة
و شويتين الضحك والتريقـــــــــــــة
شفت الحية . لفيت . لقيت الألــــــــذ
تغييرها . و ده يعني التعب و الشقا
عجبي

عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبي

في الهو ماشي يا بهلوان إش إِش
يا فراشة منقوشة علي كل وش
شقلبت عقلي و عقلي شقلبني
و كنت باحسبني بقيت ما اندهش
عجبي

وقفت ساعة الصبح باغسل سناني
قالت لي شايف قوتي و لمعاني ؟
إيش تطلب اليوم مني ضحكة أسد ؟
والا ابتسامة اعلانات أمريكاني ؟
عجبي

الحلو يم اليم صابــــــــــح رايح
سارح في حضن الميه سابح سايح
الحلو داب في البحر , قلــــت أدوقه
وجدت لسه البحر برضك ماــــــلح
عجبي

يا كل كلمة للعجب في قامــــــــــــوس
انسكلوبيديا لسان العرب أو لا لاروس
تعالوا نجدة . ده لسه في عصـــــرنا
الشمس و البحر العريض بالفـــلوس
عجبي

الموج تلول تهبط وتطلع تلــــــــــــول
يا بحر خدني الشط صاحبك ملـــــــول
و الا بلاش الشط ح اعمل به أيـــــــه
ده ريحته طحلب مهري و ام الخلــول
عجبي

ما آنتاش بتلعب ليه يا روح بابــــا ؟
و لا عسكري و لا لص في عصابة ؟
إلعب أسد أو ديب رهيب أو غـــــزال
دي الدنيا في نهاية المطاف غابـــــة
عجبي

ورد في ورق سلوفان يا حلوة اهديلك ؟
و الا انقله بالطين في الشتلة و اجيلـــــك
الأولاني لو وحا بحنــــــــــــــــــــــانــي
عجبي علي التاني بإيــــــــه يوحيلــــــــك
عجبي

أنا قلبي كوكب و انطلق في المدار
حواليكي يا محبوبتي يا نور ونـــار
يلف مهمــــا يلف ما بيكتفــــــفيش
وتمللي نصه ليل و نصه نهــــــــار
عجبي

الأرض شوك أيوه لكين هايش
و الحمرة مش يعني الطريق حايش
دي دمنا السيال .. وبشرة خيـــــــر
ان انتي عايشة و ان كنت أنا عايــش
عجبي

إيه اللي خدته من مرور السنــــــين
يا قلبي الا دمعتك و النيــــــــــــــين
بتئن و ترجع و بتفرح و ترجع تحــن
مع إن مش كل البشـــــــــــر فرحانين
عجبي

اوقات أفوق و يحل عني غبــــــــــايا
واشعر كأني فهمت كل الخبايـــــــــــا
و افتح شفايفي علشــــــان اقول الدرر
ما أقولش غير حبة غزل في الصبايــــا
عجبي

عيني رأت مخلوق في غاية البشاعة
أنا قلت له لما تأملته ساعـــــــــــــة
اللذه و الموت علموك اللــــــــــزج
و انا علموني الفلسفة و الشجاعــة
عجبي

غطس وقب الموج نهود بمبي
من ألف جيل جمالات ما تعلم بي
يا قلبي عيب دول امهاتنا القدام
أستغفر الله العظيم ربـــــــــــــي
عجبي

علقت في المسمار قناع مهزلة
ومعاه قناع مأساة بحزنه ابتـــلا
بصيت لقيتهم يشبهوا بعضهـــم
واهو ده العجب يا ولاد و الا فلا
عجبي

ظهر المسيح الحي علي سفح ربـــــــــوة
و نزل بهالة الضي و قعد في قهـــــــــوة
بصوا .. تعالوا .. قالوا خليه في حالــــــــه
الناس في حالهم يا بني .. مالهمش دعوة
عجبي

لولا اختلاف الرأي يا محـــــترم
لولا الزلطتين ما لوقود انضرم
و لولا فرعين ليف سوا مخاليف
كان بيننا حبل الود كيف اتبرم ؟
عجبي

يا وردة قلبي معاكي في الريح لعب
لا تعبتي م الريح و لا قلبي تعــــــــب
احنا كده : نرتاح في صخب الجنون
و في السكون بنخاف قوي و نترعب
عجبي

مركب ورق من نفخة تتطـــــــــوح
ركبتها و الكل بيــــــــــــــــلوح
سوحت فيها اتنين و خمسين سنــــه
للآن ..... و لا بتغرق و لا تـــــروح
عجبي

عالجسر فت الصبح تحت الضباب
بين اللي لسه بينغرس و اللي طاب
ما اهتز قلبي لنبت طالع جديـــــــد
قد اللي ماشي .. وتحت باطه كتاب
عجبي

يا خالق الكون بالحساب و الجبر
و خالقني ماشي بلختيار و الجبر
كل اللي حيلتي زمزمية أمـــــــل
وازاي تكفيني لباب القــــــــــــبر؟
عجبي

قاعدة قناني الخمر ساكتة و ساهية
مع ابن آدم في الشبه متناهيـــــــــــة
مفيش كده روقان في لحظة تشوفهم
و بعدها بلحظه يودوا في داهيــــــه
عجبي

حتة محارة وجدتها في يوم لقيـة
قالت لي شوف كيف الطبيعة شقية
نظرت للكهف اللي فيها و لقيــــت
إن الطبيعة كمان لا أخلاقيــــــــــة
عجبي

بلياتشو قال إيه بس فايدة فنونــــي ؟
و تلات وقق مساحيق بيلونونـــــــي
و الطبل و المزامير و كتر الجعـــــــير
إذا كان جنون زبوني زاد عن جنوني
عجبي

نقطة مرارة كمان علي مشروبـــــــــــي
دوبها يا ساقي حسب مطلوبـــــــــــــــي
طعب الحياة .. مش برضه فيها و فيها ؟
ليالي وردي و نهارات خروبــــــــــــي ؟
عجبي

وسط الحطام اتفرجوا يا أنـــــــــام
تمثال ملك . و مبوله م الرخــــــام
لتنين نحتهم نفس أسطي الحجــــر
و كانوا ذات يوم كتلتين لسه خــام
عجبي

عيد و العيال اتنططوا ع القبـــــــور
لعبوا استغمايه .. و لعبوا بابــــــور
و باللونات و نايلونات شفتشـــــــي
و الحزن ح يروح فين جنب السرور
عجبي

أنا قلبي كورة و الفراودة أكــــــــــم
ياما اتنطح و انشاط و ياما اتعكـــــم
و اقول له كله ح ينتهي في المعـــاد
يقول بساعتك ؟ و الا بساعة الحكم ؟
عجبي

الضحك قال يا سم ع التكشيـــــــر
امشير و طوبه وانا ربيعي بشيـر
مطرح ما باظهر بانتصر ع العدم
انشالله أكون رسماية بالطباشيــر
عجبي

أهوي الهوي و همس الهوي في العيون
وبسمة المغرم ودمعه الحنـــــــــــــــون
و زلزلات الحب نهد الصبـــــــــــــــــــــا
أكون انا المحبوب أو لا أكــــــــــــــــون
عجبي

يا ملونين البيض في شم النسيـــــم
لون الحنين و الشوق و خمر النديم
ما تعرفوش سايق عليكو النبــــــي
تلونوا الأيام بلون النعيــــــــــــــم ؟
عجبي

الدنيا صندوق دنيا .. دور بعــــد دور
الدكة هي .. و هي كل الديكـــــــــور
يمشي اللي شاف ويسيب لغيره مكان
كان عربجي أو كان امبراطــــــــور
عجبي

قطي العزيز راقد علي الكنبــــــات
في نوم لذيذ .. و بيلحس الشنبات
و انا كل عين فنجان مدلدق قلــق
صدق اللي قال إن الحياة منابات
عجبي

قالوا السياسة مهلكة بشكل عـــــــــــام
و بحورها يا بني خشنة مش ريش نعام
غوص فيها تلقي الغرقانين كلهــــــــــم
شايلين غنايم .. و الخفيف اللي عـــــام
عجبي

سلام سلام سلام سلام ... سلام
كلام كلام كلام كلام ... كلام
هز الورق يا صاحبي كدهــــوه
يطلع كلام سلام .. و سلام كلام
عجبي

فوق تحت . ورا قدام . يمين شمـــال
في الجو . تحت الميه . أو في الرمال
طلب الكمال يحرم علي الممـــــــــكن
و الممكنات دول محرومين م الكمال
عجبي

هات يا زمان و هات كمان يا زمان
غير بسمة الشجعان مامني يــــبان
هو اللي داق الفرحة يوم ثورتـــــه
يقدر يعود و لا ثانية للأحــــــزان ؟
عجبي

عبثا باقول واقرا في سورة عبس
ماتلومش حد إن ابتسم أو عبس
فيه ناس تقول الهزل يطلع جــــد
و ناس تقول الجد يطلع عبـــــث
عجبي

يومي علي الله تنتهي و تغيــــب
الشمس و تعود تاني يوم لهاليب
زي الحياة مأساه و من كترهــــا
بقي لا انتهاءها و ابتداءها عجيب
عجبي

علم اللوع اضخم كتـــــــــاب في الأرض
بس اللي يغلط فيه يجيـــــــــبــه الأرض
أما الصراحة فأمرها ســـــــــــــــــاهل
لكن لا تجلب المال و لا تصون العرض
عجبي

أنا كان لي أب . و كان رئيس محكـــمه
ستين سنة .. في قضية واحدة أترمي
ستين سنة و طلع براءة و خــــــــرج
يشكي الحياة و الموت لرب السمـــــا
عجبي

قالوا ابن آدم روح و بدنه كفـــــــــــن
قالوا لأ بدن . قالوا لأ ده روح في بدن
رفرف فؤادي مع الرايات في الهــــــوا
أنا قلت لأ روح في بدن في وطــــــــن
عجبي

البط شال عدى الجبال والبحور
ياما نفسى اهج..احج ويا الطيور
اوصيك ياربى لما اموت ...والنبى
ماتودنيش الجنه .. للجنه سور
عجبى!!!!!!

صلاح چاهين

مسحراتى

مسحراتى فى الطريق الصعب
منقراتى و كل دقه بقلب
إحنا الشعب
المصرى أول سيرة الإنسان
احنا من صخر العزيق والصبر
واحنا من طل وندى المواويل
زى ما اتعود علينا النيل
زى ما اتعود علينا العطش
يمكن خطأنا فى الزمان الطويل
كان من سبيل الرحمه والحنيه
يصعب علينا فى يوم نفارق عيالنا
وماجاش فى بالنا
زى العرق‏:‏ الدم يبنى البيوت
يا اللى الشقا من ست آلاف حبنا
اللى يزرع واللى يصنع خير بيعرف ربنا
واللى يعدل فى نصيب اليتيمه يعرف ربنا
واللى بينوّر طريق المدينه يعرف ربنا
واللى يضرب فى قلوب الأعادى يعرف ربنا
سجدت لله الكريم الهادى
والمشى طاب لى
والدق على طبلى

مسحراتى من جنود الأرض
منقراتى كل دقه بفرض
أطلب غنايا زى أب ضناه
القدس لاحت فى الطريق حاضناه
يا رب علمنى العطش والجوع
واجعل لعينى دموع
واجعل لقلبى ضلوع
واجعلنى صوت الشهيد
فى النبض والتنهيد
شريان فلسطينى شجر مزروع
فى الأرض جدر وفى الليالى فروع
يسمعنى خال فى كل بلده وعم
جرح الملاجىء عمره ما يتلم
تفنى الليالى ولا يبور الدم
ولا طيارات الأمريكان تمنع
النور من المصنع
ولا كل ريف تحت السما يسمع
طير الحمام يسجع
ولا ابن إنسان الأمل يرضع
ولا ليل شجاع يولد نهار أشجع
ولابد يوم أرجع
ويمد فى كل العرب حبلى
المشى طاب لى
والدق على طبلى

مســحـراتى يا مؤمنين
مـنـقـراتى مد الأنين
الله على رعشة الحنين
عمره ما كان الأمل ضنين
يا قدس نوارة السنين
كأن عينى فى ميتمى
يا قدس ما يحتمل دمى
الا أشوفك وأرتمى
وأبوس ترابك المريمى
أبوىَ وابنى على فمى
ما اتوهش يا قدس فى المطال
يا عاصره مهجة الرجال
سقاكِ من دمعته الهلال
يا قدس يا سبحة الشقا
الأعمى فى سجدتك رأى
والفجر من صخرتك سقى
يا قدس تتفجر الجراح
والصبر حرب وأيوب صلاح
يا أخت من مكه والبطاح
قلبى انضرب للعرب وصاح
لابد من فتح فى الصباح
المشى طاب لى

والدق على طبلى
ناس كانوا قبلى
قالوا فى الأمثال:
"الرجل تدب مطـرح ماتحب"
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال

لما تقول أجمل ما فى الدنيا، الميه للعطشان
يعرفوك عربى
أما للراوى ريحة البرتقان فى مداخل يافا
يعرفوك عربى
لما تقول ابنى اتولد لاجئ
يعرفوك عربى
لما تقول يا رب
يعرفوك عربى
لما تباشر جهادك، ترمى أوتادك
فى قلب دابح ولادك
يعرفوك عربى

فؤاد حداد

المصريين أهمه

المصريين أهمه
فى الدنيا أول أمه
متحضرين ومؤمنين
المصريين أهمه
حيوية وعزم وهمه
جيل بعد جيل متقدمين
المصريين ..

قلبى وياكو يا مصريين فين ما تكونوا
إنتو أفراح القلب وهمـه وشجـونـه
ومادام قلبنا كده على بعضنا
نرضى ربنا والخير ح يزيد
وتعيشى يا مصر ف عزة ونصر
مرفرف فوقنا علم ونشيد
المصريين ..

المصرى فى أى تاريخ ميلادى أو هجرى
وفى أى مكان وزمـان هو هو المصـرى
لاسمر أبو ضحكة ترد الروح
أعرفه من بين مليون إنسـان
صاحب واجب بفديه بالـروح
ولا يرضـى بذل ولا بهـوان
والمصريين أهمه

توت .. توت

قطـر الفجــريـة عـــدى

وأنـا لســـه ع المخـــدة

فى منامـى . . شفت الـواد ده

ما ليلى يامـه طاقيـتو تــوت

وتــوت وتـــوت وتــوت

قطــر الفجــريـة عــدى



قطــر الفجــريـة عــدى

جـانـى الحـليــوة وشفـتـه

نـادى علـيــا عـرفتـــه

من غيـر كسـوف حـلِّفـتـه

تمـلى فـى المـنـام يفــوت

وتــوت وتـــوت وتــوت

قطــر الفجــريـة عــدى



ليــه يـا امـه صحتـينــى

ليـه عنــه فــرقـتـينــى

معـلشـى بـكـره يجيـنــى

ويـدور شـربـاتنا ع البيـوت

وتــوت وتـــوت وتــوت

قطــر الفجــريـة عــدى

فى الجنة

اللى يعيش يامـا راح يشوف
واللـى يلف يشـوف عجب
شـفـنا العجـايب بالألوف
واحـنـا مـا يعجبنا العجب

عـاشـق ونـاره مشـعللة
وعينـيه خجـولـة مسبلـة
أول مـا طـال ابـن الحلال
نسـى عهدنـا وقطع الصلة
نفضـنـا من حبه الكفـوف
مـن غيـر ندامة ولا عتب
واللى يعيش ..

"المذهب"

وصـادفنا عنتر فى الرجال
تقـل وجمـال وجـاه ومال
شعـلقـنا فيـه وشغلنا بيـه
أتـاريـه جنانه مالوش مثال
ده القطن لو يوم يبقى صوف
عمر الصفيح ما يكون دهب
واللى يعيش ..

" المذهب "

وانـت يـا جـى لنـا هنـا
ولهـان وطـالـب قربـنـا
إيـه الدليـل انـك أصـيـل
مـا تخـونـش أبـدا حبـنا
أصـل اللـى آمن للظروف
يـرجـع يقـول أنـا السبب
واللى يعيش ..

حـديـث تليفـزيـونـى

سـيــداتـى آنســاتـى ســادتـى . . .
ده حـديـث ، عـن مشكـلات الـوحـدتـى .
يـامـا قـالـوا فـى السيـاسـة وكـرروا ،
يـامـا نـاس فى الوحــده باتـوا يفكـروا ،
كلهــم ، قـالـوا كـلام جـدا غلــــط !
ومحــدش صـــح ، غيـر أنـا فقــط !
أنـا عنـدى فكـــره ، لكـن مـدهشــه ،
وكبيـــره ، ولـذيـــذه ، ومنعشـــه .
الطـريقـه يـا شعــوب يـا عـربيــه ،
انكــم مـاتـلبســوش الجـلابـيــــه .
لـمـا كلـه يـبقـى لابــس بنطلـــون ،
تبقـى وحــده مـن هنـاك لحـد هــون

القمح

القمـح زى الـدهب بينـادى شـرشرتك
وزرعـة القطــن مسـتنيه منقـرتــك
وجاموسـتك الحـلوة يم المسـقه وبقرتك
لازم لهـم حضن والا اتنين حشيش أخضر
وتجيبهم الـدار وتتعشــى فى منـدرتـك

يـا عـازق الأرض مـين غيرك حايرويها
يـا زارع الـغلة يـا مـنبت تقـاويهــا
مـين اللـى حايضـمهـا والا يـدريـها
لـو كنت مـانتاش هنـا لا قـدر الله يوم
ومين حـايعلف بـهايمـك والا يســقيها

يابـو العـيال العـيال ع الفـرن نعسانين
حاضـنين لعبهم جمال باركه وعرايس طين
والصـبح يابو العـيال حايقومـوا فرحانين
لو كنت مـانتاش هنـا لا قــدر الله يـوم
كان مـين ح يـفرح قلوبـهم بالمحبة مين

ليـام دى ع الجسر بتفوت ناس ماهيش منا
تقلـع الــزرع وتبهـدل فى نســواننـا
وتخطـف اللقمـة من أولادنـا وتــهيننا
وكل مـا يفـوتوا تحصـل معـركة حامية
ونصـبح الصـبح والشـهداء فـايـتيننـا

ليام دى ع الجسـر بيفـوتوا انجليز أنجاس
سـايبين بـلادهم وجايين يدبحوا فى الناس
ما يعرفوش السـلام وما يـعرفوش النـاس
بيحـرتـوا بالسـيوف وبيزرعـوا فى الدم
صـدق اللى قال مجرمين لم عندهم إحساس

لو كنت عــايز تعيش فى سـلام وحريـة
لو كنت عــايز تعيش للـزرع والميــه
لو كنت عــايز تعيش وتــربـى ذريـه
قـوم طـهر الـبر بالخنـجر وبالمـدفـع
من جـنس دوده انجليزى فى أرض مصريه

فى ايطاليا

فى ايطاليا

فى ايطاليـا "فينوس" بتبيع "بونبون".
فى ايطاليـا "جـوبيتر" سواق تـكس.
فى ايطاليـا "ابـو للـو" واقف جون.
فى ايطاليـا ملايـكه . . وفيهـا العكس

فى ايطاليـا مسـتودع تمـاثيـل ..
مـرمـر ، وبـرونـز ، وبشـريـه ..
كونتات ، بـارونـات من أصـل نبيـل ،
مــاشيين ، بمــلامــح أثــريـة ..

أعـاجيب فى إيطاليـا كتيــر تـلحس
بس الأعجب ايـــه – تتصــور ؟
فى ايطاليـا كمـان "ملـكة اليزابث" . .
بس الملكـــة اليزابث تــايـلر !!

تحويل مجرى الأردن

وقفـه يـابن عـم . .
واحنـا كــم وكــم ،
واللى بيجــرى بيننا ،
ميــــه ، والا دم ،
واه يـانـهـر أردن ،
ريــحك شايـله هــم

وقفــة جـدعنــه . .
وقفـــة فـلاحـين ،
علـى راس القنـــا ،
علـى قلـب اللـعيـن.
وقفــة جبــاريـن ،

بداريـن تقــــاوى ،
وقفــة كــداحــين ،
حمـاليـن أســـاوى ،
نشــايين نشــاوى ،
بنــاييـن عــلاوى ،
حفـاريـن مــراوى ،
فى الصخـر الضـنين.

وقفــة سهــاريــن ،
تنقـــال الحــكاوى ،
عنهــم ، والغنــاوى ،
أدهــم الشرقــاوى ،
وبهيـــه ويـاسيـن.

وقفـــة مؤمنيـــن ،
عــارفيــن ربنــا ،
صـابرين من سـنين ،
لــيــوم المنـــى ،
وآخــــرة المتــم ،
وقفــة يـابن عــم ..
وقفـــة عيــد لنـا.

والشـاطـر يخـاطـر ،
ويقـرب هنـــــا ،

لاجئ

حـابس ضــناه بين ضـلوعه


يـابـس وحـايـموت بجـوعه


قـاعـد ما يـعملش حـاجــه


لابـس هــدوم مش بـتوعـه

لاجـئ قـابـلته فـى غــزه


ولـه عـــيـون مشـــمئزه



راحـت فلســــطين وراحـت


الـبيــارات لـمــا لاحــت


عـلى التــلال الـمــدافـــع


وريـحـة الحــرب فـاحــت

وفـى الصـفوف الطــويـلـه


جــرجــر عيـالـه النـحيله



شــيع جنـازة الــوطـــن


لـحـد لـمـا انــدفــــن


والقــاتـل الــوغـد سـاقه


قـدامــه مــن غيـر كــفن

ميت وقبــــره الـخـــلا


والغســـل ســـيل الـفـلا



الـرمـل يســخن ويـبــرد


وهــو هـايــم مشــــرد


مـع الطـابـور اللـى رايــح


إلـى المصـير الـمـجـــرد

وفـى الطــابور ألـف أسـره


وخمســميت ألـف حســـره




حســرة عـذارى حـزانــى


ع الخـوخــه والبـرتـقانـه


اللـى الشـبـاب لـم قطــفها


والمــوت خطــفهم خـوانـه

يـا ويـل كـعوبـك يـا لـميـا


الــرملـه لسـعتهـا حـاميـه




الـــرمـل ســاخن بيـــكوى


خـالـد بيصـرخ ويـعــــوى


مـجنـون فـى أول حــيـاتــه


" يـحـــرق سـماه إيش بسوى "

وتســتمـر الـــجنـــازه


وللـجبــال اهـــــتزازه




الـحـرب ســحقت أمـلهــم


لـمـا صـبح فـى خـيـالهـم


زى الـرمـال بيـخوضـوهـا


زى الطـحين اللـى جــالـهم

مـن الإيــديــن السـمينــه


اللـى رمتـهـم رهـينــــه



علـى الـرمـال كـومـوهـم


تـحت السـيول نـيمـوهــم


وكمموا مــــعين بسـيســو


مـن بـعـد مـاكـمموهـــم

علشـان مـعين الـمنـاضــل


بيقـول يـا ويـلك يـا قـاتـل



يـا معين يـا صـوت الضـحايا


إرعـد بصـوتـك مـعـايــا


إرعب عـــدوى وعـــدوك


راح ننتصــــر فى النهايـة

خـلـى اللى حـابس دمـوعـه


يبــكى بـفرحـة رجـوعــه




للـــبيـــارات الـحبيبــه


بــعـد الـرمــال الـرهيبـة


اصــرخ فى شـعبك وقـول له


ســاعة خـلاصـك قـريبــه

انــهض وكــافــح وطـهر


البــرتـقــال راح يـزهـر

أكتـوبـر

مـن غيـر مـا نتفـاخــــر ونتبــاهـى

لا بـالـــــــرايـات اللـى رفعنـاهـا

ولا بـالحصـــون اللـى انتـــزعنـاهـا

ولا بـالـــدروع اللـى مــــزعنـاهـا

ولا بـالــــدمــوع اللـى ابتلعنـــاهـا

علـى الضنــى الغــالـى وحجبنـــاهـا

وحيـاة عيـون مصــــر اللـى نهـواهـا

واكتـوبــر اللـى كمـا النشــور جـاهـا

بـلاش نعيــد فـى ذنـــوب عملنــاهـا





أنـا اتعـس اللـى بـــدعهـا وجنــاهـا

ومـازلـت تحـت عقـــابهـا وجــزاهـا

وحيـــاة ليـالـى ســود صبــرنـاهـا

واتبــددت بالشمـــــس وضــحـاهـا

نكبــح جمـــاح الـزهـــو ، مـع أنـه

مـن حقنـــا ، ونحمـى النفـــوس منـه

ولـو " العبــور " سـالـونـا يـوم عنــه

قـول : مجـرد خطـــــوة خـدنـاهـا !

صلاح جاهين

رسالة إلى جندى

رسالة إلى جندى

يابن عمـى ياللى فى الخـط الأمـامـى
لك ســـلامــى ،
وسـلام أطفـالى ، ومـراتى ، وأبويا ،
وامـى ، واخـوالـى وعمـامـى …
كلهـم فى خيـر ومشتـاقين إليــك ،
كلهـم متلهفيـن تـرجـع لنـــا ،



وكـمان من عنـدنـا يسلـم عليـك ،
كروان الفجر ، والبط اللى سابح فى القنا ،
وإبراهيـم وحسـين وماتعـدش أسـامى



يـا ابـن عمـى ،
ياللى عنوانك فى خـط النار بعيـد ،
شـد حيلك ، كلنـا ويـاك هنــا ،
مـدفعك جبنـاه حسب وصفك شديد ،
من دمانا صبيناه صلب وحديد، قاسى وعنيد،
صـــب منه ع الأعـادى كرهنـــا.
خــد من الرجعيـــه تــــارك ،
خلى كل الدنيا تسمع فرقعة رعد انتصـارك ،
والجـميـع يـا نــور عيوننـا ،
فى انتظـــارك


صلاح جاهين

عيون البقر

الزجل ده غزل فى عيون البقــر،
يا حلاوة عـيونـه الوســاع ! ..
مـافيـهاش ولا نقطـة ضـيـاع،
فـيها ليـل، بس من غير سهر..
فيــهــا بحـــر غويــط،
فـيـهـا صـــبـر عـبيــط،
زى صـبــر الـشــجـــر!
يـا حــلاوة عيــون الـبقــر

شـعرا شـبهوا عيون حريمهم بها،
ونا شاعر، ولـه واحـده بيـحبها..
إنـمـــا يـسـتـحـيــل! ..
سـيـبـنـا م الـشــعـــرا،
احــنـا نـاس فـــقــــرا،
واللى يعشق فتاه، فيهـا م البقرة.
يـبقـى لـمـؤاخـذة تـــور

صلاح جاهين

الـنـيـل

النـيـــــــــــــل ،

العمــــلاق الجميــــل ،


فايــــت علـى البلــدان ،

نـشـــــــــــوان ..


ويـمـــــيـــــــل ،

ينعـــس تحت النخيـــل ،


وينـادى علـى أســــوان ،

بـحـنـــــــــان …


" كليوباتـره .. كليوباتـره " ..

يـا حمـــــام رخــام .


وحدى جاى من قلب صــحرا ،

وعطشـــــان كـلام …


عطشــان يا صــبيـــه ،

وانـا ميــه ســلسبيــل .




ويـفــــــــــــوت ،

لابـس لولــى ، وياقــوت ،


النيـــل أبــو صـولجـان ،

سـلـطـــــــــان . . .


ويــــــــــــــروح

لاقصــر ، وينـوح ، ويبـوح


بكـلام ماقالـوش إنســـان ،

ولا جــــــــــان . . .


" نفرتـارى .. نفرتـارى " .

يـا بنــــت الالـــــه ،


وحـدى جـاى وسـط البـرارى

وعطشــــان حيـــاه . . .


عطشــــان يا صبيـــه ،

وأنـا ميــه سـلسبيـــــل .




أســيـــــــــــوط ،

أم النبــــق زغنطــــوط ،


ومنفلـــــوط رمــــان ،

حـــــــــــــران . . .


وهنـــــــــــــاك ،

ملـــوى فـى الشبــــاك ،


والنيــل فايت ، غضبـــان ،

فيضــــــــــــــان . .




" نفـرتيتـى .. نفـرتيتـى " ..

فينــــك مــن زمـــان ،


رحتـى فيـن ، وفيـن مشيتـى

ده انـا جـاى لك عطشـــان . .


.

عطشـــان يـا صبيـــه ،

وانـا ميـــه ســلسبيـــل

صلاح جاهين .

النجــوم

حضـنت عـودى باغنّـِى
عـود الحبيبـة فتننــى
أَغنى غنـــوة حزيـنة
والاَّ ح تبعــدها عـنى

يا لحـن عاشــق وحالـم
طالــع سلالــم سلالـم
إمتــى أطـول النجـوم

عاشــق دواه المحبــه
حـرام يا شابـه ده عاشق
سافـروا له يامـا أطــبا
ورجعــوا والسهـم راشق

والحـلم يلمس فــؤادى
يهمس . . يغنـى . . ينادى
آه لـو أطـول النجــوم

صلاح جاهين

الأرض

الأرض قالت آه
رديت وأنا محنى

الأرض قـالـت حـنّ
طـيرّتنـى فـتـافـيت
رديـت وقـلبـى يئـنّ
وانا مين يجيب لى مُغيت
منـك ومـن عشقـك
يـا للى عشـان رزقـك
عمـرى فى يوم ما بَوِنّ

عينـى عليكـى سنين
مَحْنـى عليكـى أب
عَبِّيت فى بطـنى طيـن
ولغيرى عَبِّيـت حـب
أنا حـالى مـن حـالك
عَتَـبـك عـلى مـالك
يـا أرض يـا فـدادين

خليك جمل يا جـدع خليك يا خـلى
متباع ومَشْرى بحق رغيف يا تمـلى
الأرض أبـعد عليك والا السما قـلى
قالوا السما للملايكه واحنا لينا الأرض
ياريتها تصبـح لنا والـهم ده يولـى

واسيـنـى واسيـنـى
يـا أرض يا عروستى
عمـرك ما تنسـينـى
ولا حضنى ولا بوستى
دانا يوم مـا انول يدك
واختـم عـلى عقـدِك
الريـح يَرِّسـينـى

صلاح جاهين

الـوحـدة

احنا الوحدة وأمتها
احنا زُراع كرمتها
احنا كتاب كلمتها
احنا الأمة العربية

كلنا روح واحدة مابتفْرق شماليه من جنوبيه
وحـده أُمـال إيـه يـا حـبيــبى
وحـده شـولـكـان* يـا بـيـا

يا مرفرف على شمالى
يـا قلبى قل لى مـالى
نسـمة هـوا الشـمالى
هـزتنى هـزه قـوية

تسـلم يا حب الأوطـان
يا مجـمع شمل الخـلان
من طنطا وحِمْص وأسوان
والسـلـوم والـلاذقـيـة

كلنا روح واحدة ما بتفرق شماليه من حنوبيه
وحــده أُمــال إيــه يـا حـبيــبى
وحــده شــولــكـان يــا بــيَّــا

يا ليل يا عينى أوف يابا وأوف يا خى
عرب الشمـال والجنوب اتجمعم فى حى
دقة قلوبهم غـنا ونظرة عيونهم ضَـىّ
اليـد فى اليـد زى السـد فى القـوة
متوحـدين بالأُخـوَّة وياما غيرهم جَىّ

وحده واحنا صناعها
ورايه واحدة بنرفعها
وقلعة بتحميها سباعها
وتحمى العزه القوميه
وحده وأفراح وأغانى
يهنـالِك يا أوطـانى
جيشـنا الأول والثانى
بحـدود الجمـهوريـة

كلنا روح ما بتفرِق شمالية من جنوبيه
وحــده أُمــال إيـه يـا حبـيـبى
وحــده شــولــكـان يـا بـيـا


صلاح جاهين

ولد وبنت

ولـــد وبـــنـت
ولـــد وبـــنـت
كـــل الجنــيـنـة
ولـــد وبـــنـت
يـا حب حاسب ده هنا
وردة ولـــــد
ووردة بـــنــت


كــان فــيه بِنَـَّـيه
خــرجـت شـويــه
فــى المــغربيــه
قــابـلت وِلــيِّــد
بــص لــها حــوَد
وقــــال أهــيــا
ســلــم عـلـيـها
فـهـمـت إيـديـهـا
قــالــت عيـنـيها
خـــلاص آمـنــت


خـجــلانــة هـيـا
ومــسـتــحـيــة
لــكــن هــنـيـة
قــال كـلمـة هــوه
وف قــلــبـه جـوه
نـــاره الـقـويــة
قـــال يــا آمـالى
قــالــت يــا غالى
غــيـرت حـــالى
ســاعـــة مـا بنت


الوقـــت مــســا
وهـــى لــســـه
ولا هـــى حـاسـة


آدم وحـــــــوا
هـــى وهــــو
اتـنيـن فـى قــصة
لـكـن سـاعـتـهـا
شـافت سـاعـتـهـا
رجـعـت لـبـيـتـها
وأنـــا ..؟
حـزنـت ..


أنا اللى كاتب الغنوة ديا
أنــا الوَلــيِّــــد
صــاحب البِنــــيَّة
اللــى عــيـونـها
قـــالت آمـــنـت


صلاح جاهين

يابو قلب وحيد

يا بو قـلب وحيد .. أنا زيك تعــالى
لـنا عمر جديد نهايـته بعيد .. تعـالى
يا غريب الروح .. إليك الروح رسـالة
"تعالـى"

أنت من غيرى وأنـا من غير حـنان
ياما قلــبى من شـقاه دق البــيبان
كـل بـاب مقــفول على جنيـنة هَنا
وابـو قـلب وحيد مالوش فيها مـكان

فيـن بـلاد الحب فين أرض الهــوى
اللى فيــها الـناس بتـتهنى ســوا
رد مـن قلــبى كـلام قال مش بعيد
يـا جريــح القـلب من إيديـك الدوا

يـا غريب .. قلـبى أنـا أرض المعاد
يـا صباح الخير عـلى أيامنا الجـداد
مـد إيـدك خـد بايـدى وابـتـسـم
خـد بإيد عـمرى وخد عـهد الوداد
صلاح جاهين

زفـة

محـلاك يـا مصـرى وانت ع الدفـة
والنـصـرة عـاملة فى القنـال زفـة
يـا ولاد بـلدنـا تعـالـوا ع الضـفة
شـاوروا لهم
غنـوا لهــم
وقـلـوا لـهم
ريسـنا قــال .. مفــيش محــال
راح الدخـيـل وابـن الـبـلد كـفى



حيـوا الرجـال السُّـمر فوق السفيـنة
حيوا اللى جاهدوا عشان مايفرح وادينا
نـظـرت لـنا الدنـيـا وشافت عملهم
مَدحِـتْ بكـل لـسان على كل ميـنا



انا قلبى فاكر لسه مين اللى جـارحـه
ولـولا يـوم الـنصر ما اتلم جرحـه
شفت القنال فى ايدين رجال من بـلادى
رفـرف عليهم قلـبى من كتر فرحـه


حبايـبنا شرق وغرب جايـين بلـدنا
والورد والياسـمـيـن هديـة ولادنـا
ونسيـمـنا بالأحـضـان يقابل راياتهم
وقـنالنا يحكيـلهم حكـايـة جهـادنـا
صلاح جاهين

عيون الحليوه

بـان عليـا حبــه
مـن أول مـا بـان
ياما كان فى نفسى والله أعشق من زمان
كـان الـحب حبـه
بان .. طـرحت محبه
وعيون الحليوه يا عينى بحر من الحنان


من أول ماشفت عيونـه
أنا قلت الليالى يهونوا
تحميه السما وتصونـه
أنا شفت اللى مستنينى
وعرفت اللى ح يهنينى
مـن أول مـا بـان
وعيون الحليوه ياعينى بحر من الحنان


من خـوفى عليه مـابـانـامشى
وافرش لـه طريقـه بـرمشـى
هنانى وهـواه مـا رحـمشـى
... لـيـه لمـا نـده لبيتـه
لـيـه بيـن الضـلوع خبيتـه
مـن أول ما بـان.
... دى عيون الحليوه يا عينى بحر من الحنان


شبـاك الأمــل وفتحتــه
والدنيـا جنـايـن تحتــه
يا دموعى خلاص ارتحتـوا
من إمتى يا قلبـى فرحنـا
والـدنيـا بقت تشـرحنـا
مـن أول مـا بـان

عيون الحليوه يا عينى بحر من الحنان

صلاح جاهين

مدونة الشعرالعامي

ازيكم يااخونا.....
اللي عايز يقراالشعر يتفضل